-مهم جدا لكل واحد بيربي كلب أنه يعرف جدول التطعيمات
وليه بنطعم الكلاب اصلا،
ببساطه شديده التطعيم بيحمي كلبك من أمراض شديدة الخطورة.والتطعيمات وقائيه مش علاجيه
-ايوه يعني انت بتديها عشان تحمي كلبك من الاصابه بامراض فيروسيه وبكتيريه وتحميه من الحشرات والديدان
-طيب يعني ي دكتور أنا لو طعمت كلبي ضد الأمراض الفيروسيه خلاص كده كلبي مش هينصاب واخليه يخالط اي كلب مصاب مثلا ببارفو
-الاجابه لا طبعا
-هشرحلك .مش معني انك طعمت كلبك ف كده كلبك مش ممكن ياخد عدوى من كلاب مصابه
-لا معناها انك بتقوى مناعة كلبك ضد الأمراض دى وبتقلل فرص الاصابه لكن مش بتمنعها بسبة 100%لكن الكلب المطعم لو انصاب بتكون الأعراض اخف شدة ومناعته قويه عكس الكلب الغير مطعم من الأساس اللي صعب يخف من الاصابه
-طيب ي دكتور أنا لو هشترى كلب اطعمه ايه وامتا
-هقولك فيه بروتوكولات كتير هقولك اشهر اتنين منهم وكلهم صح .
-هنتكلم عن التطعيمات الفيروسيه والبكتيريه ووقتها
البروتوكول الاول
وفيه بنبدا من عمر شهر بندى تطعيم اسمه الثنائي (وده بنديه للحمايه من أهم مرضين للجراوى الصغيره )١-مرض البارفو
٢-مرض الديستمبر
-بعد ٢١يوم من الجرعه الأولي بندى تطعيم الثماني (للحمايه ضد ٨امراض)وهم ١-البارفو. ٢-الديستمبر
٣-البارانفلونزا. ٤-الالتهاب الكبدى. ٥-الكورونا
٦-الادينوفيرس
٧+٨-نوعين من الليبتوسبيرا
-يتم إعطاء جرعة ثماني (جرعه ثالثه)بعد ٢١يوم من الجرعة الثانيه.
*البروتوكول الثاني.
-بنستني لحد عمر ٤٥يوم وندى اول جرعه ثماني وبعد ٢١يوم من الجرعه الأولي ندى جرعة ثماني ثانيه ثم جرعة ثماني ثالثه بعد الجرعه الثانيه ٢١
-سواء فالبروتوكول الاول او الثاني الاتنين صح نتبع أيا منهم
ويتم تكرار تطعيم الثماني كل سنه مره وحده ف نفس موعد الجرعة الثالثه
تاني نوع من التطعيمات الفيروسيه وهو تطعيم السعار
-وده اخطر فيروس لانه بينتقل للإنسان فلازم ندى تطعيم السعار عشان نحمي الكلب ونفسنا من الاصابه بمرض السعار
-بندى السعار بعمر ٣شهور فيما اكبر
-جرعة واحده سنويا وهو ده اللي بتطلع بيه الرخصه
ممكن يكون فيه بعد الأعراض بعد التطعيم زي خمول وهمدان واسهال لابد من متابعة الكلب وعدم تغيير مكانه وعدم تغيير الاكل وعدم إعطاء شاور الا بعد اكتمال التحصينات
-مهم جدا يتم فحص الكلب من قبل الطبيب قبل اعطاء التطعيم
ثانيا:تطعيم الديدان
-يفضل تكون الأم مطعمه ضد الديدان خلال فترة الحمل.فلو الام كانت مطعمه ضد الديدان هنبدا تطعيم الجرو عند عمر ١٥يوم
-ولو مش متاكد أو الأم مش مطعمه ضد الديدان هنطعم الجرو من عمر يوم
-يتم تطعيم الديدان كل اسبوعين حتي عمر ٣شهور
-ثم يتم تطعيمها شهريا من عمر ٣شهور حتي عمر ٦شهور
-بعد عمر ٦شهور يتم تطعيم الديدان كل شهرين
ثالثا.تطعيم الحشرات
يتم التطعيم شهريا للوقايه من الحشرات
-من الممكن تختلف الفترات باختلاف نوع التطعيم زى البىافيكتو يتم تطعيمه كل ٣شهور
